侯城爭分「曼」無一失

侯城爭分「曼」無一失

英超煞科大戰看點喺5隊波身上，護級區域兩隊爭一個降班位置，侯城今場贏波都好，都要寄望紐卡素贏唔到韋斯咸，咁就有機會憑得失球差壓過對手護級成功，曼聯上一周主場已經謝埋幕，呢場已經無心戀戰，雲高爾都已經集中搞緊下季轉會事宜，呢場作客玩吓手出盡所有細路落場，加埋對方布魯士話晒係昔日功臣，可能費SIR都落柯打格外開恩，一於捧侯城主場贏波護級成功。（周日42，now623台周日10:00am直播）

侯城如果今屆真係護唔到級真係非常黑仔，因為對上幾場波，最關鍵一戰就係主場對般尼，佢哋全場佔優，偏偏輸個角球時，多遜俾球證勒令離場止血打少個，就係呢個絕無緊有嘅攻勢侯城輸0:1，如果嗰場波攞3分嘅係侯城，現時降班嘅都幾有可能係紐卡素。
不過事實已經成事實，侯城呢一周都真係破釜沈舟，除咗自己要生性贏曼聯之外，仲要希望紐卡素失分，先有可能逃出生天，只係對上7次對曼聯輸晒，侯城呢場又續缺利維摩亞、加斯頓拉美利斯等，中場實力肯定打折扣，要贏好視乎曼聯放唔放佢哋一馬。

雲高爾未必盡遣強陣

曼聯已經篤定第4，上周和埋阿仙奴已等同今季煞科，呢場連雲高爾都費鬼事再諗點玩，而事實上，雲高爾一向有用新仔癮，以往巴塞、拜仁甚至荷蘭國家隊都好，一有無關痛癢比賽肯定有新星出場，而今次都唔使估，睇怕占士威爾遜、麥尼亞都有機會落場，而迪基亞一來有傷二來好大機會離隊，呢場都可能再由華迪斯把關，如果真係咁曼聯都讓晒賽，侯城睇嚟主場贏冇問題，護唔護到級睇個天，又或者打個電話俾艾拿戴斯盡力做低紐卡素啦！