捧維迪斯「禾」氣收場

捧維迪斯「禾」氣收場

季尾啦！周中都好難搵場好波睇，不過今晚兩場爭歐霸資格嘅荷甲附加賽，又的確值得留意吓，當中維迪斯下半季一輪連勝，最後竟然以第5名過終點，氣勢上比起其餘三隊都強，今晚佢哋先作客施禾利，睇嚟都有力先保不敗，待次回合再喺主場爭勝，首回合先捧兩隊打成平手。（周四5，香港時間周五2:45am開賽）

維迪斯上半季只贏得5場，睇怕都冇咩人估到佢哋下半季會咁勁，二月打後佢哋贏咗11場，整個下半季只輸3次，當中一場以0:1不敵冠軍燕豪芬，對阿積士都贏波，似乎今季荷甲除咗雙雄之外，就以維迪斯嘅實力最標青，當中車路士借將貝特蘭查奧爾季內狂轟13球，加埋一堆90後新星，維迪斯雖然經驗唔夠但一打順就勢不可擋。而事實上，今場佢哋肯定唔怕作客施禾利，季內兩遇對手都只係各贏一次，輸嗰一場仲係季初狀態唔好時，所以呢一次作客打和已經係最低消費，次回合返到主場更加係有壓一嘅贏面。

海倫芬承「諾」開主勝

至於同日較早時間另一場有海倫芬對飛燕諾，飛燕諾本來個第三位置好穩陣，點知季尾4場波輸3場，竟然俾阿爾克馬爾搶咗個第三位置，球隊現時氣勢直插谷底。好彩嘅係，佢哋喺附加賽唔係撞上維迪斯，否則可能兩回合輸晒都似，而今場對手海倫芬近5場贏2場和1場，狀態雖然只算合格，不過季內兩戰飛燕諾不敗，球隊肯定有信心喺主場先下一城，睇番飛燕諾近場失球數字甚高，而海倫芬兩大射手史拉格維亞同烏夫腳風都順，呢一戰有埋主場之利，唔好講先下一城，甚至有機會贏兩三球鎖定出線優勢。（周四2，香港時間周五12:30am開賽）