阿仙奴大炒冇「蘭」度

阿仙奴大炒冇「蘭」度

英超今晚進行補賽，新特蘭雖然等住1分救命，不過阿仙奴再贏一場就肯定直接躋身下屆歐聯分組賽，加上主場嘅兵工廠近況唔錯，絕對冇藉口讓路，所以黑貓照計都冇運行，捧阿仙奴「讓主」。（周三15，now621周四2:45am直播）

阿仙奴近13場比賽僅嘗一敗，當中更曾經造出8連勝佳績，早前圍攻史雲斯但最終輸0:1，不過上周作客奧脫福可以迫和曼聯保不敗，相信眾將嘅士氣已經立即提升，畢竟兵工廠目前只需一勝，就肯定夠分直接晉身下屆歐聯分組賽，目標咁鮮明，領隊雲格冇理由唔叫球員搏命。
阿歷士張伯倫、阿迪達同埋迪保治因傷缺陣，不過阿仙奴幾位中前場球員狀態唔錯，阿歷斯山齊士、艾朗藍斯、辛迪卡索拉同埋基奧特都喺近期有不俗演出，連復出咗一段日子嘅禾確特亦操番起，配合兩個上緊位嘅新星比利連同埋高基連，主場出擊嘅兵工廠依然係心水之選。

新特蘭多名主力缺陣

新特蘭季尾稍為回勇，分別賽和史篤城、李斯特城，另外擊敗愛華頓同埋修咸頓，近4戰保持不敗並一口氣搶走8分，只係黑貓嘅護級任務並未達成，佢哋目前排第16位，踢少一場之下領先尾3嘅侯城3分，換言之要攞多1分至肯定上岸，最後兩輪分別作客阿仙奴同車路士，真係有啲危。
大家比較熟悉嘅祖迪高美斯、魯迪維爾、布朗、列卡度艾華利斯同埋基亞卓尼利全部因傷缺陣，當中除咗基亞卓尼利已失正選之外，前幾位都係主力，所以新特蘭無法以最佳陣容去打生死戰，多少令人信心不足，考慮到阿仙奴攻起上嚟唔係人咁品，是役「讓主」有1.72倍搏得過。