祖雲達斯盡「素」獎盃

祖雲達斯盡「素」獎盃

為咗遷就祖雲達斯為意甲爭光，可以喺6月初同巴塞決一死戰，意大利盃決賽突然改咗喺呢個周中上演；拉素已穩奪歐戰資格，呢個意盃僅為名譽之爭，不過對於衰足十年嘅意甲嚟講，今季俾祖雲達斯坐上三冠王寶座，似乎對於整個意甲發展振興更加有利，而且拉素現時聯賽排緊第3位，全力衝擊下屆歐聯席位更實際，呢一戰表面上係一場決賽，實情係拉素讓路俾祖記壯行色居多，睇好「老婦人」捧盃而回。（周三16，now633台周四2:45am直播）

拉素今季表現出色，2月中開始一度10戰9勝，喺聯賽已經殺到上第3位，剩低2周賽事領先拿玻里3分，嚟緊周末大戰羅馬，贏波就肯定取下歐聯資格，當然主力高路斯口口聲聲話唔怕祖記，仲話決賽一場過，咩事都可以發生，不過拉素今季兩負祖記而未入過1球，呢番說話都係做吓樣，如果今場大敗都唔好覺得出奇，而且真係要取捨，拉素肯定希望留力打低羅馬攞到歐聯資格大於一切，意大利盃讓俾祖雲達斯絕對合情合理。

老婦人力爭三冠王

事實上，艾歷尼今季領軍真係出色，雖然有啲行運醫生醫病尾，因為早幾屆干地搞好防守，而佢就喺進攻上就加添新元素，先至有今日呢支祖雲達斯，不過亦因為咁，現時呢隊祖雲打法極之整體，前中後三線平均，上場歐戰有普巴復出，作客皇馬都保不敗，區區拉素根本不足為懼，而艾歷尼都話，呢次係佢哋第二擊，實踐三冠王願望，雖然今場摩拉達要停賽，不過仍有洛蘭迪呢個前西班牙國腳，中場派路、馬治斯奧、維達爾人齊，睇破都冇咩人阻到佢哋捧盃。
最後翻查往績，發現祖雲達斯近6次對住拉素贏咗5場咁多，踢法明顯食住對手，而最重要都係，雙方2013年曾喺意超盃碰頭，結果祖記仲勁到大勝4:0而回，證明一場過盃賽更加唔會怕拉素，喺有晒證明下，捧祖雲達斯絕對合情合理。