捧全北汽車有「京」喜

捧全北汽車有「京」喜

二哥唔掂要勞煩真正大佬出手！早喺亞冠分組賽水原藍翼對住FC北京冇乜優勢，搞到真正盟主全北汽車要出手嘞，呢場16強首回合再見番FC北京讓到半、一，照捧上盤隨時會有「京」喜。（周二1，now671台周二6:00pm直播）
千祈唔好以為FC北京喺亞冠分組賽兩戰水原藍翼取得1勝1和，對住同樣嚟自韓職嘅全北汽車未必冇得踢，事關上上季全北汽車以81分奪得聯賽冠軍，而「二哥」水原藍翼就只係得67分，有成足足14分嘅距離咁多就知道係汽車絕對係大超班，並唔係一般嘅韓職球隊可以媲美。
不過最恐怖嘅係呢隊汽車靠嘅並唔係外援，而係一班「本土派」搶分，睇番佢哋幾件巴西外援，無論係干卡維斯、李安納度洛迪古斯，又或者伊甸奴唔係老到行唔郁就係冇乜料到，係得個澳洲後衛阿歷士韋堅遜比較可信，能夠喺韓職同埋亞冠有咁好成績射手李同國有好大功勞，當然韓橋遠亦係當打新星，另外唔好忘記佢哋嘅中後場都有球員入選到南韓國家隊，當佢哋係一隊南韓國家隊嘅二隊咁睇都唔過份。

北京僅靠外援撐場

當然你都可以話FC北京嘅外援質素唔錯，好似黑山中鋒丹恩奴域同埋南韓中場河大成都幾有威力，問題係其他位置嘅球員質素麻麻，唔及得全北汽車個個都有唔錯嘅作戰能力，所以咪見到首回合見到主隊要讓到半球、一球咁辣，今個回合捉實上盤，留番下個回合先愛國啦。