水原藍翼橫「素」千軍

水原藍翼橫「素」千軍
    
亞冠盃16強首回合賽事，南韓嘅水原藍翼喺主場硬撼日本柏雷素爾，預計可藉天時地利人和先拔頭籌，事關客軍走勢明顯回落，水原藍翼一定會趁火打劫，讓半球、一球上盤如「雷」貫耳！（周二2，now670台周二6:30pm直播）

水原藍翼日前喺南韓本土聯賽以1:0擊敗咗濟州聯，走勢開始回穩，而且陣中4位外援當中，只係得巴西前鋒卡奧喺呢場比賽正選登場，其餘包括北韓射手鄭大世僅以後備身份上陣，而巴西前鋒伊塔帕隆拿同埋山度士祖利亞更加休戰，留力意味好濃，今晚擺到明會派遣最強陣容撲擊到訪嘅柏雷素爾，雖然中場金恩善仍在養傷階段，一定趕唔切復出，不過國腳級門神鄭成龍傷癒後已經重奪正選位置，所以後防將會更加穩陣，預期水原藍翼可取得不失球嘅勝局。

柏市進攻火力疲弱

來自日職嘅柏雷素爾，上周聯賽喺主場只可以以0:0賽和湘南比馬，夾夾埋埋已經連續4場比賽無法取得入球，走勢急速下滑，兩位主力包括後衛增島龍也同埋門將桐畑和繁都需要養傷，防線遇上好大難題，呢次真係攻不銳守不穩，雖然射手李安度蒙迪拉喺上輪日職亦先列後備，同樣有留力味道，不過由佢夥拍基斯坦奴達施華同埋工藤壯人去攻堅已經好耐冇入波，呢個組合嘅威力同效率只係一般，想喺作客環境下取得「士哥」甚至贏波的確唔容易，柏雷素爾信唔過。
水原藍翼走勢好，傷兵少，又有主場之利作後盾，今場亞冠盃16強首回合難尋敗理，讓半球、一球買上盤係最佳選擇。