捧拿玻里斬瓜切「塞」

捧拿玻里斬瓜切「塞」

喺啱啱過去嗰個周中先至捱過眼瞓睇拿玻里點樣喺歐霸出局，點知轉個頭又見番佢哋出場，喺自己地頭對住已經降班嘅切塞納，係時候贏番場波，向無數失望嘅主場球迷交代吓啦！（周一5，無綫網絡電視301頻道周二3:00am直播）

只要有睇上個周中場歐霸，難免會認為拿玻里並唔值得殺入決賽，事關前鋒希古恩加埋荷西卡利祖射極唔入，中場恩斯治尼亂咁嚟，甚至係領軍人物咸錫亦只係後備上場，明顯成隊波都冇乜狀態，當然「盃賽專家」賓尼迪斯嘅調動亦係好有問題。不過老江湖賓帥今晚唔會咁易就放過切塞納，一嚟有傳佢會喺季尾走人，又係時候要整番靚張履歷表嘞，二嚟對手切塞納已經篤定降班，就算開到「-2」咁辣，若果唔能夠喺主場贏波贏盤，咁以後仲有面見人嘅？

費倫天拿主場去「馬」

早場費倫天拿亦喺歐霸俾西維爾技術性擊倒出局，不過入唔到決賽未必係件壞事，始終佢哋仲要喺聯賽搶分力保下季歐霸嘅席位，出局可以令到佢哋面對現實，呢次作客嘅帕爾馬有難。（周一2，無綫網絡電視301頻道周二1:00am直播）