車仔客場照「布」強陣

車仔客場照「布」強陣 

車路士嘅英超冠軍夢雖然已經達成，不過作為盟主，得84分埋單點夠呀，最後兩輪贏晒有90分就差唔多，所以佢哋今晚作客冇嘢爭嘅西布朗，絕對有權波盤齊贏離開，讓半球、一球買更上盤。（周一4，now621台周二3:00pm直播）

西布朗上場聯賽作客1:1打和紐卡素，近4場英超不敗，不過領隊普利斯表示，季尾可以率領西布朗走出護級危機，係佢執教生涯中最滿意嘅成績，咁講法係咪代表任務已經完成呢？事實上，西布朗唔愁降班又冇嘢爭，無心戀戰都好正常。
賓科士打係球隊唯一傷兵，計落並唔算多，只係球員唔聽話就深深打擊士氣，陣中嘅施斯隆上周對完紐卡素之後唔肯跟隊巴走，新聞話佢自己搭咗4千幾蚊港幣的士返屋企，激到高層紮紮跳，今晚隔隨時會被雪藏，真係自己捉蟲。
車路士上場聯賽冇出盡全力，結果主場同利物浦踢成1:1，球隊對上一次輸波已經係1月份嘅足總盃，而中場夏薩特又啱啱當選英格蘭足球先生，繼早前奪得英格蘭球員先生之後再獲殊榮，真係雙喜臨門，難怪好多人都話佢遲早會同C朗、美斯睇齊。

車仔首循環輕勝

傷兵方面，奧斯卡杜斯山度士、拉美利斯同埋迪亞高哥斯達仲未好番，不過藍戰士大把貨，例如哥倫比亞中場古亞達度仍然未證明自己，呢啲季尾波有得上陣梗係要搏表現啦，隊長泰利成為英超史上最多入球後衛之後，隨時又入波刷新紀錄。首循環交手，車路士主場輕鬆贏2:0，佢哋當然想多啲分過終點啦，是役讓半球、一球可吼上盤。