新特蘭做“李”世界

   新特蘭做“李”世界

    英超前四大局已定，但榜尾形勢依然亂過亂世佳人。除般尼與昆士柏流浪肯定殘酷一叮外，最後一個降班席位仍然未知“瓜”落誰家。由排第十四位嘅維拉至尾三嘅侯城，隨時都會成為陪葬者。

    今晚“候選”名單中嘅兩隊，新特蘭與李斯特城就要“埋牙”，為求自保將會展開肉搏戰。雙方近況都有起色，且實力又屬半斤八両，初盤開出只係平手相當正路，但佔有主場之利嘅新特蘭唔使讓波更值得捧場。

    先後殺敗修咸頓與愛華頓，新特蘭開始望見家鄉，但一日未埋岸，始終都會夜長夢多。況且最後兩輪將要作客兩大豪門車路士與阿仙奴，要搶分的確難樂觀，所以今仗趁有主場之利，唔搶冇得搶，必會全力搏殺，爭勝决心勝於一切。

    踢多一場只多新特蘭一分嘅李斯特城，同樣未能安枕無憂，但只要今仗全取三分，基本上可以護級成功。不過近八次對賽，李斯特城只得一勝兩和五負，往績明顯輸蝕。去到呢個重要關頭，新特蘭心理絕對有優勢。

    推介：新特蘭一比〇