捧拿玻里「普」天同慶

捧拿玻里「普」天同慶

出得嚟行，預咗要還啦！歐霸盃4強首回合拿玻里玩嘢，主場僅和迪尼普1:1，故此今晚次回合作客去東歐烏克蘭，一定要打真軍全力爭勝，上次中招嘅朋友，今晚買番拿玻里讓平手、半球上盤可填數。（周四4，有線62及202台周五3:05am直播）

迪尼普呢支烏克蘭黑馬，真係唔聲唔聲嚇你一驚，佢哋喺8強淘汰比利時球隊布魯日都係僅僅過關，未見有任何耀目演出，點知作客拿玻里竟然打和，仲攞到一個作客入球，功臣係比賽尾段入波嘅沙列斯尼約夫，當時照計有唔少上盤客中招。睇番迪尼普晉級路上嘅賽事，會發現呢支東歐球隊守強於攻，而且好有心機同對手周旋，成支意大利球隊咁款，故此今仗即使捧拿玻里，各位都唔好預期會開出入球大，不過迪尼普嘅缺點係入球能力好差，上周本土聯賽亦輸俾名不見經傳嘅索爾亞0:2，當中係有留力因素，但係睇番數據，佢哋射門次數真係幾少。
拿玻里最近戰績有啲浮沉，上輪意甲竟然夠膽死同篤定降班嘅帕爾馬打成2:2，以致本土聯賽要屈居首都雙雄拉素同羅馬之下而排第4，爭取下屆歐聯入場券就要寄望喺歐霸封王。

賓帥歐戰專家值得信賴

要留意拿玻里已經連續9場比賽取得士哥，喺今晚呢類背城借一嘅焗攻場合，佢哋嘅進取踢法將會大派用場，特別係得分點分佈廣呢個優勢，你會發現拿玻里唔單止有希古恩識入波，其他球員好似咸錫、梅頓斯、荷西卡利祖，同埋最近復出嘅加比亞甸尼都頻頻取得士哥，敵衛真係幾難防範，再加上教練賓尼迪斯一向係歐洲賽專家，過往率領華倫西亞同埋利物浦嘅歐戰成績有目共睹，今晚少讓平手、半球嘅上盤可以信賴。