車仔和局有「利」可圖

車仔和局有「利」可圖

摩連奴勢保主場不敗紀錄？大家真係冇記性，上季尾當車仔唔算有太大機會爭冠時，已經試過主場輸波，摩連5季教車仔嘅聯賽主場不敗紀錄一早唔存在，而且狂人自己都講過，紀錄呢啲佢根本唔志在，既然有3場賽事喺手，肯定希望俾啲新仔落吓場爭取經驗，不過就算車仔點放水都好，利物浦都要自己有本事贏至得，班頓羅渣士要俾面焗住放謝拉特落場，史杜歷治又收咧，上場又負負碌碌至攞3分，呢場睇嚟都係似咬唔入，唔好意思！可能又係0:0浪費大家睇波時間。（周日38，now621台周日11:00pm直播）

本來曼市雙雄輪流連敗，真係俾晒機會利物浦追番上第4，不過佢哋自己又唔爭氣，對上6場聯賽只係贏得2場，冇咗史杜歷治嘅鋒線就得番史達寧有啲威脅，最弊嘅就係，謝拉特傷完、停完賽，又出嚟霸住個大佬位，中場做波係都要過一過佢腳，成隊速度奇高嘅利物浦就咁慢晒，我齋講冇用，數據反映有謝老四出場賽事利物浦勝率不足5成，冇錯謝老四得番3場波可以着起紅軍戰衣，不過就咁斷送歐聯席位，值得咩？

紅軍列隊迎藍戰士入場

咁紅軍上下有情有義，我哋都唔理得太多，至少佢哋衰落去，作為球迷季尾咪唔睇利物浦囉！不過今場又有啲唔同，因為係車仔奪冠後主場第一戰，傳統上客隊球員要先入場列隊歡迎佢哋，對於英超成立20年以嚟，未攞過冠軍嘅紅軍又係另一番感受，咁開波後又有咩好睇先？

車路士派年輕球員上陣

紅軍近3場作客只入咗個12碼，呢場唔信佢哋有咩表現，反而車仔呢場肯定好多陌生面孔值得睇睇，當中少出場嘅施治、菲臘比路爾斯、米基爾等肯定正選，葛特蘇馬終於唔使打防中俾泰利或加利卡希爾唞唞，而更值得睇嘅，就係一眾啱啱喺U21歐聯奪冠嘅小將，當中路菲斯積克、布力克文已肯定出現喺大軍名單上，仲有尼敦阿基等，呢場車仔都肯定面目全非，不過摩帥要求嘅嚴謹唔會有改變，攻唔入都未必會輸俾你，咪同對阿仙奴場波一樣，悶走你咪算囉！