捧侯城贏波「般」錢走

捧侯城贏波「般」錢走 

侯城同般尼今晚會上演英超護級大戰，侯城近況已經有啲好轉，相反般尼就連續6場冇波入，試問連入波都唔識，仲可以點搶分？足智彩開讓球盤，侯城讓平手、半球，買上盤真係可以排定隊等收錢。（周六24，now621台周六10:00pm直播）

雖然上仗不敵阿仙奴，但係侯城早前就先後擊敗水晶宮同埋利物浦，近3戰獲2勝1負，算係有交代啦，而球隊目前排喺第17位，亦即係尾3，好需要搶分護級，難得喺主場迎戰主要對手般尼，呢3分唔袋晒落袋都對唔住入場嘅球迷！達美尼度耶季尾表現出色，頻頻取得「士哥」，另一主將史堤芬昆尼亦有不俗發揮，佢兩個今晚將會成為侯城嘅搶分籌碼，加上前熱刺隊長戴臣喺後防坐鎮，如果呢支綽號老虎仔嘅球隊，可以重演早前擊敗利物浦嘅水準，下季要留喺英超並唔係難事。
般尼近6仗錄得1和5負劣績，而且連續6仗無法取得「士哥」，近年都好少見到有英超球隊咁削，如果連波都唔識入，留級只會影響成個聯賽嘅可觀性，而全隊最具名氣嘅前鋒丹尼艾格斯自2月之後陷於入球荒，睇怕般尼今晚都阻唔到侯城開上盤。