李斯特城名利雙「修」

李斯特城名利雙「修」 
 
近排頻頻攞分嘅李斯特城，依家仍未脫離降班漩渦，今晚留守主場出擊，絕對要全力爭取3分，撞啱客軍修咸頓季尾有下滑跡象，平手盤放心捧場。（周六25，now622台周六10:00pm直播）

比賽之前李斯特城聯賽排第16位即尾5位置，但其實只領先尾3新特蘭1分，護級形勢依然水深火熱，為求逃出生天，今晚必務求借助主場之利全取寶貴3分。事實上，李城近期演出又的確好爭氣，聯賽近6戰5勝1負，贏韋斯咸、西布朗、史雲斯、般尼同紐卡素，僅輸俾聯賽冠軍車路士，要注意佢哋對住般尼同紐卡素等護級球隊演出都好好，證明球員心理質素唔錯；至於陣容方面，紐根特、蘇馬拉巴卡約高肯定唔出得，但兩人都唔係必然主力，相反荷西烏路亞、甘比亞素等靈魂人物都可候命，李城突然失準機會唔大。
修咸頓目前落後熱刺1分排第7，仍有力爭下季歐霸資格，只係佢哋去到季尾唔多掂，近5周聯賽僅1勝但輸咗3場；此外，修咸頓今晚有杜辛泰迪治、舒尼達連同門神費沙科士打缺陣，射手加斯安奴柏利表現又時好時壞，作客李城信唔過。