曼聯小勝「水」到渠成

曼聯小勝「水」到渠成 

英超嚟到最後3周賽事！曼聯3連敗下出現危機，嚟緊仲有阿仙奴同爭緊護級嘅侯城要打，要確立歐聯資格呢晚一定要贏水晶宮至得，而主隊喺柏祖領軍下，迅速走出降班區域，現時有42分下已經連輸3場，成隊個心一早飛咗去放假，所以今場道理上都唔會阻曼聯發達；不過曼聯上場連12碼都唔入勁唔爭氣，呢場想贏都未必有力大勝，睇嚟都係1球上落居多。（周六40，now621台周日12:30am直播）

曼聯今季一度殺到上第3位，可惜輸俾車仔之後洩氣3連敗，當中中路冇咗卡域克明顯係最大原因，連帶中前場費蘭尼、桑馬達等都突然失色，連續3場0入球下，雲高爾都需要搵個一個冇卡域克都識入波嘅方法。
但好彩嘅係，曼聯現時需要嘅分數唔多，佢哋手執65分，比第5利物浦多4分，而紅軍就算贏晒餘下賽事最多都係攞70分，所以曼聯餘下3戰取1勝2和已經足夠，難怪雲高爾都幾定，近日有時間迅速為下季組軍，當中迪比已成為曼聯新季第一簽，嚟緊仲有多名球員喺雲高爾購物籃中，曼迷似乎又唔需要過份擔心。

沙夏倒戈望證明自己

同曼聯一樣，水晶宮又係3連敗，不過水晶宮現手執42分，實際上已經護級成功，所以都唔怪得班球員無心戀戰；不過咁，成隊水晶宮11人入面，都總有一個今場有戰意，韋費特沙夏加盟曼聯後不受重用，今季仲俾雲高爾踢走，呢場肯定想證明自己，而佢都話好多謝雲高爾肯俾佢走，等自己多啲機會可以落場，睇嚟今次主場上陣都肯定想喺雲高爾面前演身價。而事實上，水晶宮雖然打風流波，都唔會想大敗收場，上一戰作客車路士，都唔係放軟手腳俾車仔大炒奪標，今戰主場出戰極可能只輸1球俾曼聯。