巴塞隆拿「仁」者無敵

巴塞隆拿「仁」者無敵 

7UP！呢個都肯定係巴塞近代足球史上，其中一個最大嘅恥辱！歐聯4強戰首回合賽事，巴塞主場再同拜仁狹路相逢，巴塞前季被拜仁兩回合大少7:0，當時大部球球員現時都在陣，難得球隊現時處於強勢，肯定希望報仇雪恨，拜仁傷兵多都不止，仲要個個都係絕對主力，呢場靠倒戈由艾簡達拿領軍，睇嚟哥迪奧拿都只係希望輸少當贏，不過MSN組合無堅不摧，睇怕贏2球以上都唔係咩難事。（周三28，有線61、64、201及203台周四2:45am直播）

巴塞前季兩回合0:7不敵拜仁，睇怕巴塞上下以至球迷呢世都記得，不過當時巴塞有維拿路華抱病在身，由副手領軍出戰，球隊士氣差大敗都無可厚非。

巴塞內部士氣高昂

不過時唔同往日，巴塞現時由安歷基領軍，正向三個冠軍進發，而MSN組合進入下半季己大爆發，今季總共轟入108球，當中上場對科爾多瓦，3人就包辦6個入球，當中最令人印象深刻一幕，就係美斯讓12碼俾尼馬射，成隊波嘅合作性同互相信任程度之高，睇怕都拍得住年前哥帥領軍奪六冠時代。

拜仁獨忌快速前鋒

巴塞咁強勢，作為前度主帥嘅哥迪奧拿應該震過貓王，因為應該冇咩人夠佢明白，究竟一支火力全開嘅巴塞有幾恐怖，呢一場拜仁防線天殘地缺，巴斯杜巴及阿拉巴肯定缺陣，中場續缺2R，前線利雲度夫斯基爆鼻，呢場打唔打得都未知，而最大鑊係今季拜仁已展現過，遇上靈活反應快嘅波圖，拜仁幾個唔夠級數嘅防守球員，係可以一個上半場輸兩三球，諗番月前波圖主場如果把握力好啲，拜仁首回合點止輸1:3，呢場對正嘅係全球最強鋒線，拜仁莫講話唔失波，輸少過3球都已經萬幸。