浦和紅鑽放心「吼」實

浦和紅鑽放心「吼」實
     
亞冠盃G組賽事，澳職球隊布里斯班獅吼雖然喺主場出擊，不過對住強勢嘅日職球隊浦和紅鑽，要贏波真係有難度，足智彩開出讓球盤，獅吼讓平手、半球玩唔過，浦和紅鑽下盤「布」佳音。（周二1，now671台周二5:00pm直播）

布里斯班獅吼啱啱喺澳職季後賽淘汰圈出局，佢哋作客阿德萊德聯輸1:2，今季本土聯賽正式玩完，佢哋喺該仗嘅表現並唔算好，被對手嘅奇治葛雲同馬比兩次突襲搞掂，只係靠布萊治個人表演一度追平，目前球隊士氣一般，讓波有啲搵笨。

藍翼鬥北京和味濃

毫無疑問，浦和紅鑽喺亞冠盃G組已篤定出局，但並唔代表佢哋要放獅吼一條生路，畢竟紅鑽呢排走勢好順，已經連續3場贏波，最重要係上場日職擊敗死對頭大阪飛腳，報上屆屈居聯賽亞軍之仇，今晚搏佢哋乘勇開下盤。
同組南韓水原藍翼主場對中國FC北京，如果打和可以雙雙出線，雖然大家賽前話會盡全力比賽，唔會夾計賽和，不過仲會有人信呢個世界有體育精神咩，亞洲波喎！莊家開2.9倍和局都知咩事啦！（周二2，now670台周二5:00pm直播）
而C組伊朗富拿特主場對烏茲別克塔斯干火車頭，兩隊已經篤定出局，擺明係例行公事，據知大家都會派後備出場，無壓力下交手可望開出大比數波膽，直接捧2倍嘅入球大，隨時半場已經大咗。（周二8，香港時間周三12:05am開賽）