祖雲達斯主場稱「皇」

祖雲達斯主場稱「皇」

英超、德甲、意甲全部冠軍塵埃落定，呢個時候注意力當然去晒歐聯戰線上，星期二晚先有祖雲達斯主場面對皇馬大戰！表面上全世界都睇好銀河艦隊可以殺入決賽，但事實係皇馬今季整季演出，只可以用「有運」兩個字講晒，而現時呢隊祖雲達斯，喺攻守平衡上反而係歐聯四強最平均一隊，皇馬隨時輸兩三個反擊首回合大幅落後，主隊絕對有能力先下一城。（周二9，有線61、64、201及203台周三2:45am直播）

皇馬自上季由安帥帶隊開始，其實真係行緊兩年大運，當然我唔係蘇師傅，不過事實的確證明佢哋真係好彩得滯，先係上季歐聯補時追平馬體會，今季22連勝撞正歐聯打弱組，太遠呢啲可能大家唔記得，就近戰5連勝，贏切爾達撞正占士洛迪古斯射門省中人入網，上場破西維爾主場金身，又係靠對方短短5分鐘少打一人乘虛而入，同巴塞MSN組合比，皇馬反映出嚟只係一種各自為政，合作性欠逢嘅足球，今季歐聯入到四強，聯賽竟然仲有得同巴塞爭，本身已經係一個奇跡。

「好勝」C朗分裂球隊

事實上，皇馬問題之多，根本唔係三言兩語講得晒，C朗嘅所謂「爭勝心」已搞到球隊分裂，後防卡斯拿斯不穩，中場一缺摩迪歷完全失去控制力等，我哋已經分析過好多次，所以近期皇馬打一啲具組織力嘅球隊，往往都處於被動，現時支撐球隊嘅，僅僅係球星一份唔輸得嘅尊嚴，今場面對合作性強嘅祖雲達斯，真係難信佢哋可以輕鬆過關。

摩拉達倒戈去到盡

睇番拜仁、巴塞、皇馬，其實都各自有問題存在，反而歐聯4強中，以祖雲達斯三線最平均，防線基亞連尼、巴沙利及邦路斯，除咗係祖記四連冠成員，亦係國家隊隊友，連同門神保方默契己尤勝任何球隊；中場雖然續缺普巴，不過維達爾加上派路級數十足，馬治斯奧亦可勝任中場任何位置，前線摩拉達加泰維斯既有速度亦有極強把握力，而前者今場倒戈更肯定加多兩錢肉緊，相信祖雲達斯是役必有能力取得入球。