帕爾馬不敗有「卡」士

帕爾馬不敗有「卡」士
   
凡事都有兩面嘅，唔好以為帕爾馬下季肯定散班就會搞到人心惶惶，事實上陣中有唔少球星都要博吓表現等其他球隊收留。你話帕爾馬要唔過？今晚作客卡利亞里隨時保住不敗！（周一12，無綫網絡電視301頻道周二2:45am直播）

由季初到季中長追帕爾馬對家肯定可以收埋唔少，原因非常簡單，就係球隊陷入財困搞到有汗出、冇糧出，仲邊有球員會咁笨認真踢吖，不過嚟到季尾就唔同講法嘞，事關成班球員等緊其他意甲球隊收留，再交行貨隨時會搞到飯碗都冇埋，所以你咪可以見到帕爾馬今季淨係贏過6場意甲咁大把，不過當中有3場勝仗係喺上個月內取得，話晒都叫做贏過烏甸、祖記，同埋巴勒莫，對番卡利亞里即刻變得冇難度。

卡利亞里後防太脆弱

當然帕爾馬今季作客淨係贏過一隊基爾禾咁大把，唔敢捧客勝都好正常，問題係主隊卡利亞里喺主場近6戰輸足5場，夾埋仲失咗13球波咁多，真係唔知憑乜嘢成為大熱，見到帕爾馬有得受讓，驚博客勝太過冒險都唔好錯過「讓客」。