阿仙奴見血封「侯」

阿仙奴見血封「侯」
   
連雲格都開口認輸，不過並唔代表阿仙奴會喺餘下賽事行行企企，唔好忘記「前三」一日未到手一日都未完成任務，今晚作客護緊級嘅侯城唔會留手，少讓半球、一球絕對係「城」竹在胸！（周一14，now621台周二3:00am直播）

都唔記得雲格有幾年未贏過摩連奴嘞，雖然佢哋上場只係同車路士踢成平手，繼續持續呢個不勝紀錄，但係終於睇到「兵工廠」全場圍住對手嚟攻，贏唔到波只係冇運，當然臨場調動可以再做好啲，不過起碼睇得出佢哋有心爭勝，即使係「反雲黨」應該都會收貨。賽後雲格亦話今季英超已經分出勝負，不過唔好以為「兵工廠」可以收油全力備戰月尾舉行嘅英足盃喎，事實上喺英超能夠攞到「前三」就可以直接殺入歐聯分組賽，咁就唔會打亂季初部署，試問有邊個主帥唔想班球員喺季初輕鬆啲先？

侯城陣容甩皮甩骨

而另一個令到「兵工廠」唔傾向留力嘅因素就係對手失分，睇番剛剛過去呢個周末，同樣爭緊歐聯席位嘅曼聯剛剛喺主場不敵西布朗，令到少踢2場嘅阿仙奴多過曼聯2分，再贏埋落去就可以鎖定「前三」！可以預期阿仙奴繼續會以強陣出擊，係得阿歷士張伯倫同埋阿迪達仲未出得，不過佢哋有高基連踢到防中就冇晒問題，反而侯城就大件事嘞，前鋒謝拉域、中場辛迪加斯，同埋居迪斯戴維斯繼續養傷令到陣容甩皮甩骨，左計右計實在冇理由唔撐「兵工廠」贏波鎖定「前三」，而且賠率都算對辦，作客讓到半、一都未驚過。