曼城客場起筷食「刺」

曼城客場起筷食「刺」
   
從熱刺嘅積分同排名去分析，佢哋下屆踢歐霸已經係梗局，不過曼城仲要保住前三，以求直接晉身下屆歐聯分組賽，所以藍月亮今晚作客白鹿徑唔會放鬆，加上讓平手、半球合理，上盤起筷食「刺」啦！（周日46，now621台周日11:00pm直播）

熱刺上仗英超作客以2:2賽和修咸頓，領隊普捷天奴倒戈贏唔到，不過近兩場聯賽總算保持不敗，陣營內嘅不利消息包括中場拉美拿始終唔適應倫敦生活，幾乎肯定季尾後離隊轉投國際米蘭，而門將洛里斯亦傳出成為曼聯羅致目標，多少影響軍心。前鋒哈利卡尼當選今屆英格蘭最佳年輕球員，絕對值得慶賀，不過熱刺目前有3個踢閘嘅球員受傷，包括基爾獲加、丹尼路斯，同埋因肩傷而提早收咧嘅賓戴維斯，換言之多次講明唔鍾意踢閘嘅維頓漢又要客串，球隊後防穩健度令人擔心。

力保前三直接踢歐聯

曼城上場聯賽主場以3:2力克阿士東維拉，取得英超兩連勝，連護級球隊都唔開綠燈，證明藍月亮仲未放棄爭取前三，以求鎖定直接踢下屆歐聯分組賽嘅資格，季尾波一定睇鬥心行先，目標咁鮮明抵捧吖，總好過主隊熱刺成班球員等放暑假。基捷基治、高柏尼、拿斯尼同埋祖維迪受傷，不過有輕傷嘅耶耶托尼據報可以上陣，而阿古路就爭緊神射手，唔會同對手客氣，首循環曼城主場大勝熱刺4:1嗰陣，阿古路食出大四喜，而上屆曼城作客熱刺都贏5:1，而家少讓平手、半球，上盤唔使諗啦！