車路士W「晶」心策劃

車路士W「晶」心策劃

今晚最緊張嗰一場波就肯定係熱刺對曼城，不過車仔捧盃喎！又點可以唔睇先！賽前摩連奴又同雲格柏歷堅尼隔空罵戰，似乎聯賽冠軍差唔多到手，摩帥都有啲無聊要搵啲嘢做吓先，不過從另一邊睇，摩連奴同啲對手鬧到咁僵，呢場斷估都要大勝一場唔可以俾位人入。水晶宮一早攞夠分護級，呢場咪當賣個人情俾摩帥，話唔定下季再遇車仔都會手下留情報恩，睇好車仔大勝一場捧盃。（周日35，now621台周日8:30am直播）

摩連奴由上周對阿仙奴後，一直都係傳謀焦點，全因佢泊大巴惹來質疑，如果係季中階段車仔公務繁重，摩連奴都懶得同你玩，不過喺周中再贏李斯特城後，車仔只差2分就足以稱王，摩連奴似乎都已經好得閒，咪積極應酬吓班口痕友囉，先係公開方面，佢不斷作出一啲無可反駁嘅言論，例如無論從入球、失球、取分、主客成績，邊一項唔係車路士最佳，你只可以見到一支好強嘅車路士，擺到明係反駁一啲話佢打功利足球嘅言論。
而上星期摩連奴又走去串雲格，話一隊波十年冇聯賽冠軍悶，定佢嘅戰術悶，雖然冇直接指明係雲格，但教授對號入座終於忍唔住，話有啲人應該學吓點尊重人先。而團火仲燒埋柏歷堅尼度，因為摩連奴早兩日話曼城違反FFP，應該要被扣分，而柏帥就反駁車路士係球會仔，因為一支強大嘅球隊係識控制球賽同積極爭取入球，睇怕如果唔係雲高爾係摩連奴師傅，摩帥燒埋佢嗰叠都未定。

客軍風流波未必搏盡

不過成日都講，又唔抵得摩連奴咁串，聯賽冠軍手到拿來，今晚一贏水晶宮，就可以喺主場高舉獎盃，呢個咁簡單嘅任務，對於車仔嚟講未免太容易，事關呢場波除咗有杜奧巴之外，迪亞高哥斯達肯定可以復出，摩連奴都話，如果呢場贏波，餘下賽事一定唔會再出呢個射手，希望佢可以休息根治大腿傷勢，其餘位置上亦冇傷停，車仔今晚實在太穩陣，而另一邊嘅水晶宮已有42分，無欲無求柏祖通常好識做，呢場大敗俾你，賽後換吓波衫同你哋一齊慶祝囉！