李斯特城橫「素」千軍

李斯特城橫「素」千軍
   
李斯特城喺護級直路演出大有進步，今晚留守主場出擊，對手更只係殘陣兼毫冇鬥志嘅紐卡素，唔攞晒贏波3分點對得住球迷，足智彩有讓球盤提供，信李斯特城讓平手、半球可開上盤拆「紐」。（周六25，now621台周六7:45pm直播）

雖然上周以1:3輸波，但對手係榜首嘅車路士，李斯特城全失3分都唔失禮，更何況佢哋近5戰取得4勝1負，奮力護級下已經由榜尾回升至尾4，都話希望在明天架啦！賀夫同埋安迪京治喺上輪英超勇戰受傷，不過有傳兩者經治療後冇乜大礙，而射手占美華迪輕傷後嘅空缺，亦有基斯活特可以填補，最重要係前中後3位主力包括荷西烏路亞、甘比亞素同埋隊長韋斯摩根健健康康，免卻舟車勞頓留守主場出擊，絕對值得信賴。
相反地，唔愁降班又無力爭前列嘅紐卡素就鬥志全失，佢哋已經直落輸咗7場，上輪喺聖占士對史雲斯都反輸2:3，雖然穆沙施素高復出，但係柏比斯施斯仲要坐多一場波監，加上迪奧迪、真馬特、杜密特、希達拉、路蘭度艾朗斯同埋洛艾利洛等人全部倦勤，真係難阻李斯特城開上盤。