曼聯和局東成「西」就

曼聯和局東成「西」就

英超呢個星期，前列都係等睇車路士捧盃啫！不過排緊第4嘅曼聯，分數上都未完全穩奪前4，餘下4場都要攞多5分左右，而且雲高爾都唔太想打歐聯附加賽，肯定想過曼城及阿仙奴頭，呢一周主場對西布朗會有戰意，不過對家普利斯最叻打強隊，現時佢哋有37分，攞多1分幾乎九成上岸，呢場肯定擺大巴守到你暈，似乎都幾有機會開個和波出嚟。（周六50，now621台周日12:30am直播）

雖然話爭5分至肯定取得前四資格，不過以利物浦、熱刺、修咸頓個勢，都唔係太似追到上嚟，而且曼聯季尾得場阿仙奴較難打，如果真係要估前四邊隊有機會跌落嚟，都只有係要連對熱刺、修咸頓嘅曼城，所以曼聯都當自己手執歐聯資格下，已經着手下季組軍，有傳曼聯以近1億鎊招攬加利夫巴利，而多蒙特嗰邊根度簡冇續約，有傳亦可能過檔曼聯，加上早前已經傾緊嘅迪比，曼聯嚟緊夏天睇嚟都會有好大動作，所以聯賽最後呢幾場，除咗紅魔要爭分之外，其實都係俾現有球員爭取表現，唔係曼聯下季咁增兵法，有入必有出，雲高爾掃邊個走都係未知之數。而對上兩場曼聯連敗，重點在於冇咗卡域克，而呢場佢上陣機會應該不足五成，不過防線盧祖、菲爾鍾斯都可以復出，前線朗尼重創可能收咧，雖然尹佩斯已經喺預備組打咗場仲入咗2球，但今季同法卡奧合作冇火花，曼聯都幾有可能會連續三場冇波入。

普利斯一心死守

事實上，普利斯連續幾季帶幾支唔同球隊護級成功，今季帶西布朗都幾乎上岸，現時佢哋有37分，贏一場穩陣，但和一場有38分，因應季尾幾支榜尾球隊互有交鋒，所以38分都已經夠數；而普利斯上任之後，贏過修咸頓，賽和愛華頓、利物浦，對實力份子根本未驚過，呢場作客身份又肯定會先行死守，曼聯又係一招費蘭尼屈機，普利斯點會防唔住，真係有可能開個0:0和局出嚟架！