阿聯主場值得「吼」實

阿聯主場值得「吼」實
     
澳職進入季後賽淘汰圈階段，阿德萊德聯同布里斯班獅吼先打頭陣，由於前者常規賽排名較高，故可獲主場之利，呢個絕對係致勝關鍵，畢竟兩軍實力相若，阿聯可借地利開出半、一上盤。（周五1，有線64及203台周五5:30pm直播）

阿德萊德聯季尾表現其實有啲反覆，連勝紐卡素噴射機同埋FC悉尼之後，又連負布里斯班獅吼同埋西悉尼流浪者，好在常規賽煞科戰以4:1大勝墨爾本城，球員信心恢復之餘，陣營士氣亦相當好，美中不足只係馬朗尼上仗領紅，要自動停賽一場，不過柏蘭卡、柏保路山齊士、泰歷艾列治同埋甘馬倫屈臣等主力腳風順，而卡路斯卡、沙治奧施里奧同埋迪捷特幾位箭頭亦可分擔入球重任，新人馬比經過磨練後更嶄露頭角，阿德萊德聯喺橢圓球場出擊可睇高一線。

獅吼戰亞冠影響體力

布里斯班獅吼喺常規賽最後一輪只能以2:1力克榜尾嘅紐卡素噴射機，建功球員分別為高夫丹寧同埋拿茲蘭羅拔，贏得比想像中驚險，明顯受到亞冠盃賽事拖累，畢竟佢哋嘅比賽場次遠較阿德萊德聯多，早前先後遠征中國對FC北京，同埋喺南韓對水原藍翼，只係取得一勝一負成績，但就飽受舟車勞頓之苦，單係呢點已經輸蝕，加上林巴達拉迪斯、丹尼爾保尼斯同埋史堤芬魯圖等球員因傷倦勤，想用最佳陣容出擊都唔得，一場過嘅淘汰賽冇Take Two，情況唔樂觀。
兩軍過去幾次交手互有勝負，算係平分春色，不過阿德萊德聯藉較高排名獲主場之利，讓半球、一球上盤可睇好。