皇蘇讓波不“利”

皇蘇讓波不“利”

    西甲明晨安排一場下游之戰，由皇家蘇斯達對利雲特。皇蘇一早已經脫離降班威脅，餘下比賽只屬例行公事，所以近期戰績認真差強人意，近六戰非和則負未贏過一場，反映球隊確實戰意不足。今季卅四場聯賽中，和波場次佔最多，有十三場與對手不分勝負。如果開盤受讓就冇問題，但倒轉要讓對手的話，的確靠唔住。

    利雲特目前排第十五，雖然與降班線嘅拉科有六分之差，但一日未正式上岸，都依然難以安枕，等於“吊鹽水”一樣，講爭勝鬥心，利雲特一定較皇蘇積極。

    初盤皇家蘇斯達讓半球，睇返呢兩季嘅對賽成績，兩隊好似簽咗“蘇利”和約，四次交手都係和氣收場，想贏盤，當然“利”字行頭。

    事實上，利雲特對住皇蘇在往績方面明顯佔得優勢，近八次對賽，利雲特未輸過一場，兼有三場勝仗。講近況，連續殺敗加泰與科爾多瓦，足以證明球隊嘅護級决心，無論士氣與狀態，利雲特都在皇蘇之上，就算今場踢作客，至少亦可保住不敗。   

推介：和波1:1