車仔衆志成“城”

   車仔衆志成“城”

    英超明晨繼續進行補賽，揸住半邊盃耳嘅車路士作客李斯特城，祇要攞多三分，冠軍獎盃應該可以刻定“車路士”三個字，我話嘅。至於仲未脫離危險期嘅李斯特城同樣要為護級而搶分，但以球隊嘅能力要在車仔身上攞分，實在相當艱難，唯一優勢只有主場之利，只望博得一分得一分。初盤車路士讓半球／一球，除非老摩玩攤凍嚟食，否則一定上演屠“城”記。

    “四”字唔通係李斯特城嘅幸運號碼？四月份四戰四勝，豪取十二分後，護級形勢出現一線曙光，氣勢簡直係英超各隊之冠。但講真一句，除上場護級大戰對住般尼外，其餘三場都係戰意有限兼踢風流波嘅對手，李斯特城先可以乘虛而入。今場對住要提早“登基”嘅車仔，要搶分應該無能為力。

    車仔上場悶和阿仙奴，老摩嘅一分政策真係吹佢唔脹。今場踢作客，唔排除老摩依然穩字派，繼續以穩守突擊為主。不過，以球員嘅進攻質素，要攻破李斯特城嘅脆弱防線唔難，至少一球冇走雞。

    推介：車路士2:0