蜜蜂兵團「仁」者無敵

蜜蜂兵團「仁」者無敵
   
拜仁都真係要多謝慕遜加柏，因為禾堡早一日喺聯賽輸波，變相拜仁已經喺下周聯賽開波前提前鎖定冠軍，球員多一份喜悅少一份壓力，道理上應該有進一步表現，不過事實上，自高普宣佈離隊之後，多蒙特已取得2連勝，似乎班球員都想以好表現回饋呢個教頭，而德國盃係現時多蒙特唯一爭標希望，球隊上下呢戰一定博老命同拜仁決一高低，雖然現實啲睇多蒙特冇咩可能夠拜仁打，不過波係圓嘅，一於冷吼多仔晉級，最多輸多10蚊當送高普一程啦！（周二2，無綫網絡電視13頻道周三2:30am直播）

本來呢場波開波前，拜仁高層打算送一扎花俾高普，表揚高普呢幾年成就，不過高普就話好多謝呢個安排，因為拜仁好有禮貌，但希望可以賽後至收，咁拜仁又真係要多謝高普嘅，冇呢個教頭帶起利雲同葛斯，又點會有今日呢隊拜仁，而且如果唔係多蒙特連奪兩屆德甲，拜仁都唔會用上天文數字增兵，令到球隊可以重奪德甲之外，仲有力喺歐聯爭標，所以拜仁呢兩年成就，或多或少都要多謝高普。

德國盃高普最佳禮物

換轉另一邊，多仔冇咗高普下季會點未知，但至少陣中幾大主力，如列奧斯、根度簡、香川仔等，都明白高普能力去到邊，亦知道冇咗呢個教頭有幾可惜，所以近戰都知恥近乎勇，喺聯賽取得連勝，現時追到上第8，睇嚟都幾有可能攞番個歐霸位當安慰獎，不過對於球員同球迷嚟講，似乎今晚擊敗拜仁，奪取德國盃先係送俾高普最佳禮物，戰意有幾高昂相信唔需要再多講。

拜仁害怕壓迫性踢法

事實上，多蒙特都唔係完全冇爆冷可能，拜仁缺2R已經火力大減，近戰防線又不穩，面對速度高嘅球隊如曼城、禾堡及波圖，正好係拜仁今季少有敗仗，只要多蒙特再次展現出前季嘅壓迫性，根本唔怕拜仁主場，信多仔戰意搭夠，一於撐佢哋入決賽。