哥登堡小勝有「希」望 等於皇馬不敵巴塞之後一定會搵弱旅出氣，剛剛喺月中不敵馬模嘅哥登堡，上一周作客就照搵赫根出氣，再睇埋佢哋喺季初嘅瑞典盃都有唔錯嘅表現，所以今晚喺自己地頭迎戰希爾星堡，點都值得睇高一線，不過要小心嘅係，對手始終都係大名鼎鼎嘅希爾星堡，雖然希軍有彼得拿臣缺陣，但係主隊前鋒波文同埋中場施巴斯坦艾歷臣，亦只不過係剛剛好番，預計勝負將會喺1至2球之間上落。（周一1，香港時間周二1:05am開賽） 另一場近況平平嘅諾高平喺主場面對住加費萊，照樣成為熱門亦唔係冇理由，始終加費萊近兩季都係喺護級線上掙扎，加上又有一大批傷兵未出得，恐怕今季會面臨嚴峻考驗，所以唔好睇近績就以為諾高平冇機會，話晒佢哋贏過咸史達斯嘛。（周一2，香港時間周二1:00am開賽）