華倫西亞「格」殺勿論

華倫西亞「格」殺勿論
     
西甲周一獨腳戲，由華倫西亞主場對連續6場未贏過嘅CF格蘭納達，勝負已經盡在不言中，考慮到兩軍無論喺實力、近況同往績上都有極大分野，敲蝙蝠兵團「讓主」絕對冇爭議。（周一5，now632台及無綫網絡電視13頻道周二2:45am直播）

華倫西亞上場西甲作客不敵巴塞隆拿，10場不敗走勢作古，雖然係可惜啲，但係巴塞超班兼正值大勇，蝙蝠兵團僅負0:2並唔算失禮，何況佢哋早前有連勝愛斯賓奴、基達菲、科爾多瓦同皇家蘇斯達嘅紀錄，又曾大勝拉科魯尼亞、艾爾切同埋利雲特，贏波贏盤率極高，投注佢哋真係極之放心。消息指迪保羅練波嗰陣受傷，今仗上陣成疑，但係兩位射手柏高艾卡沙同埋尼格度都保持穩陣入球率，菲侯利同埋柏利祖等中前場球員亦交到功課，是役又可以「騷哥利」。
CF格蘭納達上場聯賽同西維爾踢成1:1平手，近6場西甲都無法取勝，當中包括慘負皇家馬德里1:9呢場經典恥辱，另外作客護級競爭對手艾美利亞亦要吞三蛋，目前排尾二絕對反映出佢哋未夠班，雖然格蘭納達有必要搶分力拚，可惜今仗有魯賓佩雷斯停賽，蘇利曼馬利、阿祖安哥倫加同埋艾迪柏斯古爾亦會因傷缺陣，謝臣梅里路同埋丹尼爾拿臣預計要到5月先復出，想爆冷都冇籌碼，真係搵唔到理由搏客隊囉。

主場鬥格蘭納達三連勝

睇埋往績，華倫西亞近3次主場都可以順利擊敗CF格蘭納達，過往6次交手亦取得5勝1和不敗佳績，是役勝負已經盡在不言中，所以蝙蝠兵團嘅「讓主」的確可穩陣收錢。