華倫大炒“格”

華倫大炒“格”

    歐冠盃與歐霸盃四強席位經已名花有主，西甲球會依然主宰歐洲球壇，兩大常客巴塞與皇馬，隨時會在歐冠盃决賽碰頭，爭奪歐洲球會最高級别錦標；當然唔排除德甲班霸拜仁慕尼黑及意甲老牌勁旅祖雲達斯亦有奪標機會。至於衛冕歐霸盃嘅西維爾，同樣成為捧盃大熱。

    其實講來講去，都係直指英超球會最羞家，枉稱為世界上最受歡迎嘅超級聯賽，點知歐戰成績仲差過意甲球隊，拿坡里與費倫天拿衰衰哋都衝到入歐霸盃四強，兩項歐洲盃賽，英超球會最叻只係去到十六強，跟住已無影無蹤，英格蘭足總真係要值得檢討。

    講返今日場西甲推介，華倫西亞對格蘭納達，華倫西亞目前要“保四追三”，今仗主場對住弱旅，三分志在必得。以球隊平均實力，加上主場極佳戰績，贏波應該易過借火。

    排尾二嘅格蘭納達可以話危在旦夕，只係垂死掙扎希望護級成功，惜作客成績差到無藥可救，一比九大敗給皇馬嘅陰影諗起都驚。初盤華倫西亞讓球半，一於捧硬“蝙蝠軍”。

    推介：華倫西亞4:0