阿仙奴和局正「路」

阿仙奴和局正「路」 

今晚呢場阿車大戰，表面上係一場榜首大戰，但一來雙方賽前已有10分分差，雲格又13戰摩連奴不勝，呢啲數據都帶出一個疑問，究竟雙方今場有幾認真對待今場賽事呢！而事實係，今場雙方各取1分嘅話，阿仙奴前四位置穩陣，車路士亦只需2勝就取下冠軍，呢場分勝負動機非常低，和波好正路，分分鐘開埋個0:0呃大家睇波時間都未定。（周日38，now621台周日11:00pm直播）

10分嘅分差，數字上阿仙奴仍然有機會，不過事實係就算今場擊敗車路士，都仍然有7分差距，即係話車路士必須在打後五場賽事，輸多兩場及至少和一場，而阿仙奴則5戰全勝，兵工廠至有可能奇跡奪標；當然波係圓嘅，我又唔敢講一定冇可能，不過大家研究吓個賽程先，車路士餘下五戰，對手包括水晶宮、李斯特城、新特蘭及西布朗，最難打嗰場係主場對利物浦，要車路士出現三場失分似乎可能性唔大。
相對上，阿仙奴仍要作客曼聯，而呢場波好有可能係關乎前四嘅排名戰，曼聯睇嚟都唔會輕易派3分俾你，所以無論車路士點失分都好，兵工廠都唔似贏得晒，呢場所謂嘅冠軍爭奪戰，根本上就言過其實。

雲格鬥強隊冇把握

另一個問題，阿仙奴就更加信唔過，雲格處理關鍵性大戰嘅態度，永遠係以穩為先，過去多季，阿仙奴多次主場贏唔到一啲爭標球隊，一來係雲格冇貫輸一種必勝嘅決心，而阿仙奴班兵亦冇作為強隊嘅自覺，相反摩連奴嗰套四分政策，即係主場對任何強隊都要贏，作客就要你失2分，過去已證明非常成功，呢個心態上嘅分野正正係車仔同阿仙奴最大嘅分別，所以如果你希望，雲格今場會採取致死地而後生嘅策略嘅話，就肯定你會失望。

攞一分大家有着數

事實上，兩隊喺自身最大利益上，呢場都係賽和最着數，阿仙奴如果今場力取3分不果，反而攻得太前而輸波，曼聯喺另一戰線一贏就會壓過兵工廠上第二位，而曼城亦會有機會過埋頭，雖然仍然有少打一場優勢，但未攞嘅分始終有一定壓力，相對車路士呢場賽和，維持同阿仙奴10分差距，周中對李斯特城補賽一贏就已經手執盃耳，亦冇必要呢場博命，而且今場車仔三個前鋒都有傷，雖然杜奧巴趕得切上陣，但佢威力今時唔同往日，法比仔倒戈亦有壓力，呢場和波大家開心咪算囉！