西布朗「利」捧入球大

西布朗「利」捧入球大
   
利物浦上周輸埋俾維拉，咁餘下賽季仲有咩好做？咁盡最後全力追上第四囉！紅軍因應上星期打咗足總盃，所以比曼城打少場，實際上雙方未有7分差距咁多，而且計死數，紅軍現時最多可以攞到75分，以前幾屆數字計仍有絕佳後上機會，不過呢一周要贏咗西布朗先，西布朗有新領隊普利斯上任後成績即時好轉，呢場肯定帶俾利物浦麻煩，睇嚟雙方都有入球捧大好過。（周六30，now621台周六10:00pm直播）

西布朗嘅普利斯出晒名護級勁，勁到可以上季攞埋最佳領隊，所以季中西布朗搵佢救命相當明智，而事實上，喺佢領軍之下，球隊已步入中游有36分在手，今季英超競爭激烈，有37-38分已經穩陣，所以西布朗都未必急在一時搶3分，睇佢哋對上幾場，竟然連敗予李斯特城同昆流，似乎唔只自己都想幫埋人護級，反而上仗作客贏水晶宮，真係好難估佢哋邊場先嚟認真。
事實上，紅軍都冇足夠本錢去擊敗西布朗，因應史杜歷治受傷，紅軍上場都只有眼白白睇住自己足總盃出局，不過呢場紅軍冇得慢慢嚟一定要主攻，西布朗亦有足夠火力還擊，入球大穩陣。