曼城小勝「士」日精選

曼城小勝「士」日精選

英超嚟到33周正式進入最後大直路，曼城上周終於重開勝門，不致於再俾曼聯阿仙奴愈拋愈遠，不過後有追兵嘅情況下，都唔容許佢哋餘下賽事再鬆懈，呢一周主場對維拉絕對要攞晒3分；不過維拉自有舒活上任後完全變咗第二隊波，足總盃更殺敗利物浦入決賽，現時整支球隊士氣肯定係近年新高，曼城贏到1粒已經相當理想。（周六64，now621台周日12:30am直播）

阿士東維拉最近真係裝咗支火箭咁，由幾乎踩入降班區，到依家護級形勢大好，足總盃入決賽，更加重要係舒活完全激活番射手賓迪基，呢個射手近6場波入咗8球，對比起之前大半季只入3球，真正嘅天壤之別，而呢個數據都反映出點解維拉季初攻力咁差，原來只要搞掂番呢個比利時射手，維拉根本冇需要擔心降班問題。事實上，維拉現時都幾安全，因為已經比尾3位置多4分，對落仲有幾隊隔一隔，以現時走勢睇，今屆英超如有37分應該都可以成功護級，所以維拉喺餘下6戰，取1勝2和已經好足夠，咁作客對住曼城呢一仗，自然唔會係佢哋取分目標，不過既然士氣咁好，足總盃決賽又成個月後至到，呢場亦冇理由刻意留力放3分俾曼城。

柏歷堅尼能力惹質疑

曼城士氣低落，耶耶托尼經理人更加大鬧柏歷堅尼冇料，話佢完全月帶唔到威嚴同秩序俾球隊度，佢又講到耶耶唔係想走，只係曼城唔俾應有尊重佢，因為以耶耶貢獻，理應有被當成係球會名宿嘅待遇，雖然呢個經理人都係睇錢大晒，不過佢又講得冇錯，就正正因為呢啲細節，曼城從來就缺乏一份團隊精神，早前大衛施華同阿古路等存矛盾，拿斯尼同管理層鬧翻，阿古路無故被調打邊路致入球量大減，個個都係曼城兩取英超冠軍主力成員，話柏帥唔掂，絕對唔係單講佢場上調動咁簡單。

藍月亮後防難擋賓迪基

而曼城喺呢一周，可能仍有大衛施華養傷未出得，其餘中前場都可候命，只係防線缺高柏尼，就肯定難擋大勇嘅賓迪基來犯，再加上維拉新仔格利殊唔講得少，維拉呢場都有足夠條件入波，曼城如果埋單贏到1球，都算夠運架啦！