畢爾包等收“科”

畢爾包等收“科”

    西甲今晚有場獨腳戲，由包尾大幡科爾多瓦對畢爾包。今季升上甲組嘅科爾多瓦踢咗卅二場，至今只攞得二十分，雖然仲未去到無藥可救地步，但醫返都嘥藥費，如無意外下季都要重返乙組比賽。目前唯有搏命掙扎，只望有奇蹟出現。明晨對住具有一定實力嘅畢爾包，攞到一分都當贏。

    排第八位嘅畢爾包聯賽已經無慾無求，目標係下個月尾嘅西班牙盃決賽。為咗保持球員作戰狀態，相信球隊依然會積極應戰。初盤畢爾包小讓半球，雖然科爾多瓦主場受讓，但呢班波攻不銳、守不穩，真係放都唔生，照捧畢爾包贏波贏盤。

    科爾多瓦近十四場不單未贏過，更加輸足十一場，狀態真係差到笑唔出。十六場聯賽主場，只贏過排尾二嘅格蘭納達一場咁多。一句講晒，球隊根本未夠班踢甲組。

    可能在聯賽已經無慾無求，所以畢爾包近況其實都幾反覆，但上仗四球大勝加泰，證明球隊仍然認真作戰。只要今仗有正常發揮，畢爾包勝算一定比對手較高。

    推介：畢爾包2:0