捧馬體會「里」所當然

捧馬體會「里」所當然

同一個對碰一季打8次，打網球拿度對迪祖就唔出奇，踢波呢個情況真係少見，而且皇馬更加係前七次未贏過一場，打到第八次突然識贏咁神奇？歐聯8強次回合大戰，馬體會將會作客班拿貝，不過呢隊波一向唔怕作客呢個皇馬主場，反而視喺死敵地頭贏波為樂，皇馬又有莫迪歷同巴利受傷實力大幅削弱，老實講「夫添」都未必夠馬體會打，少緊兩大主力又憑咩贏波先！（周三16，有線61、64、201及203台周四2:45am直播）

馬體會同皇馬雖然係同市球會，但管理理念上真係兩大極端；皇馬就算用邊一個教練都好，都係逢行明星主義，用球員個人能力做壓制及訂立戰術，呢一代皇馬雖然星味少咗，但呢個理念冇變，前線BBC組合，中場莫迪歷同卻奧斯，都係大名氣球員，不過係唔係人人都產生到作用，成績就證明一切；今季皇馬曾做出22連勝，當中莫迪歷墜後半格分擔卻奧斯防守責任，效果非常明顯，而前線賓施馬、巴利，經常為C朗製造簡單入球機會，令後者今季已狂轟50粒，之但係當莫迪歷一傷，皇馬中場連製做機會上前線都做唔到，除咗印證卻奧斯能力有限外，亦證明皇馬唔可以用唔同人腳去填塞433戰術嘅任合一個位置，呢場波皇馬肯定有一對前熱刺主力缺陣下，中場控制力大減，面對馬體會咁強嘅中場壓迫，睇嚟真係唔樂觀。
話馬體會理念同皇馬大相徑庭，肯定一啲都冇錯，過去幾乎每一季賣走一個主力前鋒，球隊卻依然保持穩定成績，呢個功勞當然係喺教頭施蒙尼身上，咁當然佢哋都唔係唔買人，好似今季買入嘅基沙文，啱啱聯賽又入世界波，現時身價又係天文數字，文迪蘇傑雖然有啲下滑，但前線制空力仍在，中場狠辣程度自然係馬體會殺着，今場高基、泰亞高、加比全數在陣，攻中打一個艾達杜倫，馬體會今季少有中場線咁齊腳，皇馬要過半場真係唔易。

班拿貝反成馬體福地

而更加好笑嘅係，馬體會係非常喜歡喺班拿貝搞串PARTY，今季三度作客取得1勝2和，而且場場有波入，上屆聯賽嚟到一樣贏波，呢場唔好計馬體會贏唔贏到先，信數據佢哋似乎一定有入波，皇馬一失作客入球同玩完根本冇分別，係咁點可以唔捧馬體會晉級呀！