巴塞和局「耳」熟能詳

巴塞和局「耳」熟能詳
     
有希 望係好！不過小心有時希望愈大失望愈大喎！歐聯8強次回合賽事，巴塞喺首回合作客都贏3:1，返到魯營除非一開波打少兩個，否則聖日耳門根本冇可能追得番，不過巴塞雖然鐵定晉級，係咪代表呢場波一定贏硬先？睇佢哋連場大戰下已經有啲兵疲，呢場隨時放慢節奏就算，巴黎始終有伊巴復出，睇嚟可以喺有入波下攞番多少面子出局，一於博個和玩吓！（周二10，有線61及201台周三2:45am直播）

巴黎首回合其實已經輸得少，如果唔係馬菲奧最後擺個烏龍，根本上聖日耳門就全場都入唔到波，而事實上，今季兩隊三度交手，除咗首回合安歷基排錯陣，出咗馬菲奧打左閘至輸俾聖日耳門外，其餘兩場都明顯見到巴塞係高聖日耳門一班波，所以話如果正選陣容見唔到馬菲奧，巴塞晉級都十拿九穩，呢一次返到魯營，前線繼續有齊輪住發威嘅MSN組合，又點會難尋入球呢？
不過咁，巴塞入球能力唔需要懷疑，但中場控制力差咗呢個一定係事實，恩尼斯達出任中場指揮官位置完全適應唔到，單首回合賽事已經唔知交失幾多腳，本來以為佢上場整親條腰今場繼續避戰，點知佢咁鬼硬淨已經復操，沙維上場聯賽幾乎打足，呢場小白正選巴塞效率反而大減；而更加要留意嘅係，呢個4月巴塞係地獄賽程，因為一連幾周係兩對聖日耳門，再打西維爾、華倫西亞，安歷基打到依家都仲保持不敗的確值得一讚，不過上場贏華倫，已經見到美斯都開始有疲態，呢場巴塞肯定唔想打得太快消耗體力，睇嚟聖日耳門係有機可乘。

巴黎陣容回復完整

事實上，聖日耳門今場陣容上完整好多，上場停賽嘅華拉堤同伊巴，今場都可以復出，而上場傷出嘅堤亞高施華已經冇大礙，今場可以同大衛雷斯再組防線，至少蘇九通咗渠都有人補位先，所以今場攻守能力都得以提升下，巴塞應該冇上一場咁予取予攜，計雙方都有入球下，巴塞亦唔想主場輸，點睇和波都最似樣。