波圖客場「黑」敵制勝

波圖客場「黑」敵制勝

今次真係不成功便成「仁」！歐聯8強嚟到次回合賽事，上次已經同大家分析過波圖唔講得笑，話明絕對有能力殺退拜仁，點知波圖勁到將比數拉開至3:1，雖然比數上拜仁係贏2:0就可以晉級，不過今場主隊續缺2R，進攻火力已大減之餘，防線亦繼續係上次幾個主角，又好有可能繼續俾巴謙美等玩死，呢場如果波圖一旦取得入球，拜仁要晉級至少要入4球或以上，睇嚟波圖的確有足夠爆冷本錢可以晉身四強賽事。（周二11，有線62、64、202及203台周三2:45am直播）

哥迪奧拿自從成為教練以嚟，帶隊打歐聯四強係最低消費，呢一次的確出現大危機，而有傳佢上場輸波之後，竟然賴球隊醫療團隊搞唔掂批傷兵，要知道拜仁個隊醫享負盛名，一怒之下拉隊一齊辭職，睇嚟拜仁都有啲屋漏兼逢夜雨感覺；不過就算冇呢啲負面消息，首回合對碰前我哋都分析過，話波圖喺幾個方面都會令拜仁有麻煩，例如拜仁防線絕非歐洲一線，當中保定甩漏多、丹迪缺信心、畢斯杜巴速度慢等，喺上一個回合表露無選，加埋沙比阿朗素嘅少有失誤，上場拜仁就係輸喺自己條防線手上。

拜仁首回合冇優勢

而一條犯錯頻頻嘅防線，今場仍然要面對巴謙美嘅速度，哥利斯馬嘅靈巧、積臣馬天尼斯嘅把握力，係咪真係可以咁天真以為拜仁唔會失波，現實啲啦朋友！
而更加現實嘅係，拜仁喺如斯困境下，呢場波係要剩勝2球或以上先可以晉級，唔同你計條防線會唔會再失波，前線得一個利雲度夫斯基可靠，洛賓列貝利受傷下，創造形中場得艾簡達拿同馬里奧葛斯，但首回合除咗入球一球算做到似樣攻勢外，波圖基本上全場冇咩犯錯，拜仁似咬唔入多於一切，雖然話今場拜仁有主場之利，波圖一對閘位球員停賽，但大家回想下呢隊拜仁一係唔輸，輸親就好似上屆對皇馬咁覆水難收，呢場焗攻一定俾到機會波圖打反擊，波圖晉級機會相當濃。