熱刺客場「紐」轉乾坤

熱刺客場「紐」轉乾坤
   
如果將「喜鵲」紐卡素當係一隻股票，咁佢哋嘅壞消息絕對係一浪接一浪，除咗有半隊主力唔出得之餘，最攞命嘅就係球迷杯葛入場，有齊咁多壞消息都唔跳船仲要死攬實佢哋唔放，輸錢怪得邊個？（周日37，now621台周日11:00pm直播）

前鋒柏比斯施斯同埋中場穆沙施素高停賽已經令到紐卡素相當頭痛，偏偏喺呢個時候連施安迪莊、迪奧迪、希達拉，同埋史堤芬泰萊都話有傷未必出得，換言之起碼唔見咗半隊主力，不過冇咗以上球員嘅影響未必好大，事關個個都冇心機踢波，派唔派佢哋落場都冇乜分別。

喜鵲半隊傷兵難作惡

要留意嘅就留意紐記球迷近期講明唔妥班主艾殊利，喺轉會市場冇乜動作都算，不過連受萬民愛戴、前主帥波比笠臣嘅珍貴相片當係垃圾咁掉就激嬲咗唔少死忠球迷，有消息話佢哋好有可能會發起杯葛行動，本身「喜鵲」已經冇咗半隊主力，依家冇埋主場威力點樣頂到由「英超新人王」哈利卡尼領軍嘅熱刺呀？係驚熱刺門神洛里斯有傷未必及時復出，搞到後防唔係咁穩，不過淨係吼實一口客勝就唔使諗咁多啦。