曼城小勝雄才「韋」略

曼城小勝雄才「韋」略

曼城大直路脫腳，歐聯出局之餘，英超排名又愈溜愈後，下季換血換帥係意料中事，不過佢哋今晚喺主場迎戰韋斯咸仍然有權全取3分，事關槌仔幫近況兼往績又輸晒，捧藍月亮小勝開「讓和」。（周日22，now621台周日8:30pm直播）

揸住咁好嘅人腳，曼城踢到四大皆空真係好難接受，更何況近期仲連負水晶宮同埋死敵曼聯，領隊柏歷堅尼搵定工都啱數喇。不過頹還頹，藍月亮班底依然具實力，韋菲特邦尼同埋祖維迪養傷之下，仲有大衛施華、阿古路、耶耶托尼同埋赫特等星級球員可用，主場出擊冇藉口唔攞夠3分，最重要係佢哋對住韋斯咸有一面倒嘅對賽往績支持，單計主場都連贏對手6次，未落場已經贏心理，問題係目前嘅曼城難奢望大勝啫。

槌仔幫近6戰僅贏1場

韋斯咸近況五十步笑百步，近6戰僅錄得1勝1和4負，排名由季初高踞第4，變成又家跌落第9，陣中嘅當尼爾亨利、湯堅斯同埋安祖卡路爾肯定倦勤，前鋒迪亞法沙高亦要再作賽前檢查先知能夠上陣，今晚作客曼城凶多吉少，只係對手近況一般，料槌仔幫僅輸一球造就4倍「讓和」。