紅軍維拉「和」氣生財

紅軍維拉「和」氣生財

英格蘭足總盃去到星期日晚仲有場阿士東維拉對利物浦嘅4強戰；紅軍個個一條心，係想送謝老四入決賽，等佢喺全個球季最後一場賽事，可以喺溫布萊上演告別戰。不過紅軍上下如果真係想達成呢個願望，今場最好就唔好放謝拉特打正選，等佢養精蓄銳五月尾一戰好過，而且紅軍呢場都唔係話贏就贏，講氣勢維拉易帥後好到不得了，現時護級壓力大減下，肯定會同利物浦死過，預期雙方都有入球，賽和進入加時機會好大。（周日35，now633台周日10:00pm直播）

點解人人都想喺本季英格蘭球壇最後一場賽事見到謝拉特呢？一來因為呢場係佢喺英國最後一場職業賽，之後就會飛到美國展開新一頁，二來決賽日，即係5月30日，係謝老四正日生日，咁多喜慶嘢再加埋捧盃，真係好似做騷咁做，不過如果呢單嘢發生喺第二個人身上，我會覺得好窩心，但謝拉特喎！我就只有好擔心囉！又勾起利迷不快回憶，上季世紀一跣，以往亡命回傳俾杜奧巴亨利，有邊次唔係直接斷送球隊捧盃或晉級機會，所以話謝拉特有時真係球隊死神一啲都冇錯。而喺呢個咁重要嘅時刻，贏維拉就殺入決賽，計我話信邪都係唔出神奇隊長好啲，反正佢近2個月冇一場波打足，停完賽又未必夠狀態，雖然班頓羅渣士話佢已經準備就緒，但佢同時又講到，謝老四係重要入球同重要時刻製造者，唔知係講正面定寸緊佢呢？

謝拉特復出勢成焦點

不過就算唔講呢啲負面嘢！我都睇唔出利物浦有咩能力90分鐘內解決維拉；維拉喺舒活執教下迅速重回正軌，近幾場連贏新特蘭、熱刺同西布朗，現時都已經遠離護級區6分，有足夠條件暫時將精神放喺盃賽。而更犀利嘅係，舒活真係特別擅於激活前鋒，上手有艾迪巴約，嚟到維拉就賓迪基，呢位比利時射手季內狀態一直低沉，但近5場狂轟7球，紅軍防線唔算太穩，呢場出現失球機會大，加上史杜歷治只有些微機會可以上陣下，利物浦要贏，睇嚟都要啲運至得。