紅魔不敗「士」日精選

紅魔不敗「士」日精選

車路士由今周開始，將轉入英超最後奪冠大直路！車仔現時領先曼聯8分兼打少場，以摩連奴性格，呢場肯定以打和為先，相反曼聯處於強勢，賽前已連勝6場，嗰隊新砌成嘅無敵正選陣容完全冇傷病，摩帥要打和都唔容易。要小心現時車路士陣容其實好多位置上都俾曼聯食住，呢場一於信曼聯作客史丹福橋球場至少保住不敗。（周六59，now621台周日12:30am直播）

上星期已經推介大家支持曼聯，結果有啲令人意外嘅係曼聯竟然大炒曼城4:2，咁一來係曼城自己有問題，二來曼聯套新戰術真係發揮得唔錯，以費蘭尼為中心嘅攻守轉換已非常純熟。而最值得一讚嘅係球隊落後後並冇散晒，反而係非常有信心咁反壓對手嚟打，撇開4424唔講，曼聯現時嘅信心的確回到費格遜年代咁強。今場賽事，曼聯肯定唔會作出任何變動，如此一來車路士都幾麻煩，因為喺打法上及人腳上，車路士中路防守力係遠比兩邊強，夏薩特及韋利安在防守上幫唔到太多，而一對閘位艾斯派古達及伊雲洛域，速度上會輸蝕俾左楊右華。
更加大鑊嘅係，車路士現時喺防守上已經冇以往咁硬淨，當中泰利年事已高，加利卡希爾更不值一提，對住費蘭尼會非常蝕底，而加利卡希爾第一大惡習，就係經常縮起對手喺身後，齋封射門路線而唔主動出腳，以往已經好多次改變遠射方向收死門將，而現時曼聯禁區外三支重炮，包括朗尼、馬達以及安達靴里拉，呢個省中人改變方向入網場面隨時又再現。

車仔近仗疲態畢露

對車仔及摩連奴嚟講，現時真係捱得一場得一場，分數上佢哋的確係遙遙領先，不過球隊有迪亞高哥斯達受傷，今季輪換太少致球員疲態畢露，都係近期表現跌Watt原因，不過今場已經算有好消息，因為雷米證實趕得切上陣，而且佢哋有一大動力，就係如果今周先贏曼聯，再贏阿仙奴嘅話，道理上可能提早三周稱王，不過講就易，雲高爾話晒係摩連奴師傅，呢場尊師重道又好，話雲高爾熟晒你摩帥路亦好，點睇車仔都冇優勢，寧捧當頭起曼聯點都冇錯。