慕遜加柏做阿“福”

慕遜加柏做阿“福”

    德甲明晨上演一場獨腳戲，由法蘭克福對慕遜加柏。排第八嘅法蘭克福基本已毫無降班之虞，且仍有機會爭取下季踢歐戰資格，今仗主場誓必搶分爭上較前位置。不過，講到搶分積極性，暫列第三位嘅慕遜加柏更渴望全取三分，皆因與排第四嘅利華古遜只有兩分之差，要保住“三哥”之位，定必全力爭勝。初盤慕遜加柏讓平手／半球，客軍值博可以先“法”制人。

    其實法蘭克福嘅攻擊力都唔差，廿八場聯賽攻入五十一球，拍得住前列球隊。只可惜防守能力差到“打冷震”，共失五十七球，係德甲失球最多一隊，真係得不償失。且球隊近況表現飄忽，近四戰一勝一和兩負，除上場大敗畀拜仁外，其餘三場對手都係三支包尾球隊。今仗對住實力較強兼發揮穩定嘅慕遜加柏，法蘭克福實在難有作為。

    慕遜加柏各項賽事近八場保持不敗，且有六場勝仗，當中包括擊敗榜首拜仁及三比一大勝多蒙特，狀態越戰越勇。只要繼續保持應有水準，今場不勝無歸。

    推介：慕遜加柏2:1