禾夫斯堡十「拿」九穩

禾夫斯堡十「拿」九穩
 
歐聯過後星期四晚自然到歐霸做主角。今晚焦點相信會落喺禾夫斯堡主場對拿玻里比賽身上。禾堡近年喺財力十足下，實力正逐級提升，相比下拿玻里喺意甲都冇優勢可言，首回合作客自然更難攞到好成績。（周四5，有線61及201台周五3:05am直播）

禾堡斯堡係德甲二哥，成績咁好主要原因係財政穩定，又得某車廠全力支持，可以喺轉會市場上大展拳腳，雖然超大牌球星佢哋就難以買到，但球隊勝在眼光唔錯，成功搵到一啲年輕有潛力球員願意來投，例如今季喺聯賽入咗13球嘅荷蘭中鋒巴斯杜斯，同比利時中場奇雲迪布尼都係當中佼佼者，加埋路爾斯古斯達禾同舒賀爾尼兩位有歐洲賽經驗球員壓陣，呢支禾夫斯堡絕對講得上係有潛質亦有實力。
除咗級數之外，禾堡近況亦冇乜嘢可以挑剔，佢哋最近7場波保持不敗得6勝1和，雖然對手有啲係弗賴堡、史特加同埋漢堡之流，但上一輪歐霸佢哋亦成功雙殺另一意大利球隊國際米蘭，證明唔怕意大利風格球隊；至於陣容方面，禾堡全隊得肯特一名傷兵，其餘舒爾賀尼、迪布尼同巴斯杜斯都可以候命，攻守能力都唔需要懷疑。
拿玻里啱啱喺意甲主場3:0大炒費倫天拿，但費格然依然唔認為佢哋近況好好，事關喺對費倫之前，拿玻里試過5場不勝，仲可以上番四哥位置，一名講晒其實係意甲除咗祖雲達斯外，其餘球隊實在係海軍鬥水兵格，拿玻里坐住四哥位根本冇乜咁了不起。

拿玻里歐霸客戰成績差

再講，拿玻里教頭賓尼迪斯係盃賽專家，首回合作客自然以輸少當贏為原則，務求次回合返主場再諗計晉級；此外拿玻里今屆喺歐霸客場比賽演出實在麻麻，輸過俾年青人，上輪對莫斯科戴拿模亦贏唔到，加埋有米祖、加根奴等傷兵下，今晚造訪德國難有甜頭。