波圖主場「黑」敵制勝

波圖主場「黑」敵制勝
   
歐聯今晚尚有呢場波圖對拜仁嘅賽事上演；好多人認為呢個對碰可能係8強戰四場波入面強弱最懸殊嘅一場賽事，不過我反而認為呢個對碰，至少首回合波圖主場時充滿暗湧！拜仁一兩星期內突然增添多名傷兵，雖然全部輕傷一兩星期內都可以復出，不過正好呢個星期真係全部唔踢得，上星期聯賽一度只餘下4個後備，呢場波作客葡萄牙繼續人腳不整，波圖喺本土聯賽走勢強勁，前線又坐擁多名超新星，呢場莫講話受讓，就算平手盤我都捧主隊。（周三5，有線62、202台周四2:45am直播）

如果冇細心留意雙方近況同人腳，呢場波九成九跌入拜仁陷阱，拜仁上場對法蘭克福嘅賽事，連同紐亞在內，只有四個後備可用，雖然話係哥迪奧拿有心為歐戰留力，但拜仁呢一刻的確受傷兵困擾，當中2R組合，洛賓及列貝利至少要次回合先趕到上陣，缺少呢對主力，拜仁近戰銳利度已經大減，而中場大腦舒韋恩史迪加亦有病在身，三人今場都冇隨隊，防線亦有謝路美保定未知能否上陣，今場拜仁都可以講殘陣出戰；而更要留意嘅係今場鐵定正選嘅巴斯杜巴、艾簡達拿及拿姆，全部都大傷初癒冇耐，狀態肯定未恢復十成，而且拜仁最弱一環在於防線速度，現時波圖人腳勝在反擊力強，拜仁控制唔到中場，隨時輸反擊輸到頭暈。

波圖前場新星湧現

話拜仁防線輸速度並唔係冇根據，睇吓上季點輸俾皇馬就知，當然用波圖同皇馬比似乎有啲那個，不過波圖現時多個新星，將來一一落戶皇馬並唔出奇，當中喀麥隆國腳阿布巴卡，阿爾及利亞國腳巴謙美，全部有獨立搵食能力，尤其後者腳法射術兼備，拜仁冇打兩邊守衛對付呢個翼鋒非常蝕底，中場赫達靴里拉、馬體會借將奧利華托利斯，都係極有創造力中場，唔得後備仲有南美第一超新星昆特路，波圖成條90後中前場活力十足，只要哥利斯馬唔好太獨食，呢場肯定咬得入拜仁。