馬體贏波「家」常便飯

馬體贏波「家」常便飯
   
今晚歐聯8強大戰正式開打！當中重頭戲自然係馬德里市打吡戰。馬體會季內已6戰皇馬，其中贏4場和2場，加埋過去幾季都係馬體會贏多輸少，而呢個首回合賽事先由馬體會主場，睇嚟主隊都充滿信心喺呢場打吡戰先下一城，咁嘅往績都竟然仲有平手盤買，唔買真係對唔住自己。（周二1，有線61、64、201及204台周三2:45am直播）

皇家馬德里大前仗大勝9:1，接連再贏華歷簡及伊巴，C朗順番連罰球都識入波，都可以見到皇馬的確打番出應有狀態。事實上，皇馬之所以突然上力，都真係多得中場兩猛將復出，中莫迪歷主控節奏，占士洛迪古斯則在中前場穿插，C朗同賓施馬等多咗機會入球自然滾滾來。之不過點解皇馬咁勁，都會季內贏唔到馬體會？各地球評都係得出近似結論，皇馬今季以433陣式應付各條戰線，中場完全交俾占士、卻奧斯及莫迪歷協助攻守，但問題係，呢三個中場都絕非純正搶截型中場，遇上普通球隊，以攻代守一人一個攻勢，皇馬把握力全球數一數二，絕對可以取下大部分勝利，不過遇上馬體會等以中場攔截為主嘅球隊，皇馬連將個波運上前線都有問題，所以季內6戰都贏唔到呢支同市死敵。

皇馬陣容難有變動

不過雖然明知問題所在，皇馬都冇得點變，至少前線三個大佬，C朗、賓施馬及巴利係冇邊個都唔得，中場三個人選一樣，後防四人尚算可靠，但卡斯拿斯不擅處理兩邊高波，又係中正馬體會下懷，所以今場安察洛堤唯一可變動之處，就係將巴利拉落一格出任中場，進攻時先至壓前，但巴利喺皇馬已經冇咗以前滿場飛嘅動力，此舉是否上策都係未知數。

文迪蘇傑強勢復出

相對嚟講，馬體會雖然人腳唔齊整，不過係人都知成隊馬體會冇邊個都得，有施蒙尼就可以，而且馬體會更有文迪蘇傑復出，呢個箭頭今季已兩破皇馬大門，點計數馬體會呢場都至少不敗，平手盤又有咩好擔心。