利物浦主場拆「紐」

利物浦主場拆「紐」

邊個教頭唔想有好人腳俾佢哋？咪就係啲限米煮限飯嘅領隊囉，咁先顯得佢哋有料到嘛！英超32周嚟到最後一場賽事，利物浦傷停大半隊，但近幾場打落一啲都唔失禮，輸俾曼聯阿仙奴可以講非戰之罪，相反紐卡素自柏祖離隊後竟然唔請番個新教頭，由卡華執教已愈輸愈近降班區，要知道早一日曼市打吡戰總有一隊會失分，利物浦贏番又可以追近多少，呢場信紅軍可以主場全取3分。（周一14，now621台周二3:00am直播）

紐卡素呢隊波都可以講自己攞嚟衰，早前有消息指佢哋今季少有地有盈利，個貪錢班主艾殊利梗係高興，但問題係佢好慳唔慳，柏祖走咗已經唔使佢賠，都唔肯搵個有料教頭頂住先，本來紐卡素陣內已經冇咩士氣可言，依家更直頭死多兩錢；近4場聯賽佢哋輸晒，本來坐定粒六夠分護級，但現時只係領先護級線9分，要知道近期幾支護級份子不斷搶分成功，佢哋就停滯不前，打到最後如果都仲要驚，都唔知怪得邊個。
事實上，紐卡素成績差，或者都可歸咎於隊內傷兵太多；但問題係，英超都唔係得係一隊傷兵多，利物浦自2月開始，冇一場齊人，近期又多人停賽，班頓羅渣士一樣帶到隊波聯賽有得爭，盃賽又入4強，教練功力已有分野。

喜鵲後防唔齊人

而今場紅軍都仍然殘陣，謝拉特、史基迪爾繼續停賽，後防馬馬度沙高周中傷出，今場中堅僅得3人可用，「巴神」有病繼續避戰，史杜歷治傷後又未回復狀態，其實利物浦都係打7成狀態，不過睇埋紐卡素今場後防幾唔齊人，當中哥碧克都要退守邊路，就明白紅軍點都秤先好多。