信車路士扭轉乾「昆」

信車路士扭轉乾「昆」

英超今晚上演頭尾大戰，深陷護級漩渦嘅昆士柏流浪，近況雖然稍見起色，但係遇著來勢洶洶嘅車路士，相信都要乖乖地交出3分，足智彩開讓球主客和，捧藍戰士「讓客」有2.05倍回報好抵買。（周日20，now621台周日8:30pm直播）

昆士柏流浪上場聯賽作客和阿士東維拉3:3，加上較早前爆半冷大勝西布朗4:1，近兩場聯賽保持不敗，難怪領隊基斯藍斯認為球隊護級有曙光，不過喺呢個關鍵時刻，昆流嘅傷兵就愈嚟愈多，智利前鋒伊度亞度華加斯因為膝傷緣故，已經宣布今季提早收咧，換言之前線得番查理柯士甸單打獨鬥，而達尼爾科朗、利萊費亞、艾真度科連、里奧費迪南同埋李察鄧尼等球員亦繼續倦勤，尹錫榮同埋森莫亞同樣有輕傷，領隊基斯藍斯喺排陣上都幾頭痕，要爆冷搶分好難。

藍戰士火力十足

車路士上周小勝史篤城2:1，繼續進佔榜首位置，冠軍已經袋咗落袋咁滯，雖然法比加斯喺上仗撞傷面部，但佢堅持要帶面罩上陣，而領隊摩連奴亦講明唔會留力，再攞多張黃牌就要停賽嘅尼曼查馬迪會繼續正選披甲。迪亞高哥斯達因傷要唞到5月，不過後備前鋒雷米每次上陣都有貨交，加上有杜奧巴做後盾，車仔攻力唔使懷疑，最重要係夏薩特同埋奧斯卡杜斯山度士等創造型球員全部可列陣，根本唔會怕主場嘅昆士柏流浪，足智彩開讓球主客和，照捧車仔開「讓客」。