曼市打吡「紅魔」秤先

曼市打吡「紅魔」秤先

星期日曼市打吡夠晒矚目！因為呢場除咗係一場牙骹戰，更加係今季前四爭逐中最重要一場賽事。曼聯賽前己1分壓過曼城，今場贏咗可以確立4分優勢，不過和波對雲高爾嚟講都冇壞，因為取下第3名嘅主動權仍喺自己手中，而曼城對上4戰輸3場，好意外地上場輸埋俾水晶宮柏歷堅尼都未俾人炒，而如果藍月亮今場再有咩閃失，除時連第4位置都受到威脅，想柏帥快啲收工，呢場一於幫曼聯打氣。（周日36，now621台周日11:00pm直播）

曼聯喺季中撞下撞下嘅情況下，終於搵到一個合現有球員發揮嘅陣式，當中關鍵人物肯定喺費蘭尼身上，呢個比利時中場季初一直都係清洗系列人選之一，如果唔係8月尾佢受傷賣唔出，一早已經離開咗曼聯，所以佢現時打得好，並唔係雲高爾有眼光；而曼聯現時攻守陣式，基本上都係圍繞住佢變換，進攻上，費蘭尼會處於攻中或前鋒位置，個波去到兩翼佢就入楔，再以佢身高作二傳效果相當明顯，防守時就會由442變回451，佢會回到比卡域克更後嘅位於進行第一層防守，為幾個唔夠班嘅中堅減低防守壓力，而呢個攻守變換法間接亦令朗尼及馬達等可專注做反擊，所以唔好奇怪點解迪馬利亞等現時冇位置可打，因為呢套戰術係放唔到佢落去；而今場可能復出嘅尹佩斯喺前線冇壓迫性，更加唔合發揮，雲高爾已表明今場大戰唔會改變人腳，曼聯球迷唔需要擔心尹佩斯出嚟有咩負面影響。

曼城陣營氣氛極差

曼聯搵到個靚陣，曼城呢邊就頭痕，因為柏歷堅尼呢個人買人冇眼光之餘，排陣上都好有問題，曼城對上5戰輸3場，作客更加係4連敗，防守上得一個高柏尼可靠，不過今場佢因傷唔出得，而新買番嚟嘅文加拉已證實係俾歐洲第一黑店波圖呃咗，不過本來曼城都係以攻代守應該冇問題至係，可惜柏帥根本喺度亂嚟，自迪斯高復出及邦尼加盟之後，柏帥就將阿古路放到左邊或攻中位置，令到呢個曼城最有把握力嘅射手，連埋門機會都大幅減少，上場對水晶宮已見曼城得個猜字，就算早前對西布朗，一開波打多個都只係贏3:0肯定贏得少，最白痴係有占士米拿唔用，用個落底又唔得，防守又唔夠身位嘅捷西斯拿華斯，耶耶托尼又有離心下，成隊曼城氣氛極差，咁嘅狀態同曼聯打，真係有啲天同地比。