捧愛華頓叱吒風「雲」

捧愛華頓叱吒風「雲」
   
兩支近況好轉嘅球隊相遇，白天鵝史雲斯將會喺主場迎戰愛華頓，本來講狀態就平分春色，不過拖肥糖原來專剋史雲斯，過往6次到訪有5次獲勝，所以足智彩開平手盤，放手買愛華頓啦！（周六17，now621台周六7:45pm直播）

史雲斯上場聯賽喺主場以3:1擊敗侯城，近兩場聯賽全勝，不過後衛基爾洛頓因為足踝受傷關係，已經宣佈提早收咧，而前鋒巴菲迪比高美斯就決定繼續留隊，下季仍然會為史雲斯作賽，至於喺熱刺出身嘅湯卡路爾，就因傷唔會列陣。

愛華頓往績有優勢

愛華頓上場聯賽亦喺主場贏波，以1:0擊敗修咸頓，比利時前鋒盧卡古有輕傷，不過佢正極力爭取復出，領隊馬天尼斯亦表示樂觀，至於其餘傷兵就有白賴仁奧維度、希拔、吉遜同埋艾登麥基迪，前3人已經養傷一段時間，對排陣影響唔大。睇埋往績，愛華頓近6次作客史雲斯竟然取得5勝1負嘅壓倒性佳績，近6次交手不論主客亦取得3勝2和1負，證明剋住對手嘅特質並唔係僥倖，今場比賽未踢已經喺心理上贏晒，所以足智彩開出平手盤，買拖肥糖絕對坐走望贏。