阿仙奴非一「般」抵玩

阿仙奴非一「般」抵玩
   
英超尾場由護級形勢險峻嘅般尼迎戰勁旅阿仙奴，睇怕呢隊升班馬想搶分都幾難，事關兵工廠正衝擊球隊最長連勝紀錄，辛迪卡索拉又係第100場英超披甲，半球、一球上盤非一「般」咁抵買。（周六65，now621台周日12:30am直播）

般尼今季演出其實幾惹人好感，打和車路士同埋擊敗曼城就係近期代表作，好可惜呢種巨人殺手嘅風格唔可以長期延續，近兩戰不敵修咸頓同埋悶和熱刺就係最好例子，最慘係球隊已經累積209分鐘冇入波，射手丹尼艾格斯近6場冇「士哥」，佐治保迪嘅好表現亦係曇花一現，加上奇雲朗、馬恩尼同埋馬菲泰萊都會因傷缺陣，現時位列尾二嘅般尼真係水深火熱，畢竟近11場比賽僅嘗一勝嘅成績，對球員士氣同埋信心都有好大影響，想保住英超席位真係唔多樂觀。

卡索拉英超百戰紀念

阿仙奴嘅走勢同般尼相反，佢哋喺各項賽事已經連續7場比賽獲勝，單計英超亦咁啱取得7連勝，平咗曼聯上季紀錄，如果今場再全取3分，阿仙奴就會打破自己球會嘅最長連勝紀錄，試問領隊雲格又點會叫班手足留力吖！辛迪卡索拉今日第100次喺英超上陣，艾朗藍斯就係第150次，法國前鋒基奧特仲威水，因為佢已經連續6輪英超有士哥，如果對般尼又有斬獲，就會平球會紀錄，繼艾迪巴約同埋名宿伊恩胡禮之後，成為第3位幫兵工廠連續7場聯賽都入波嘅球員，幾十個紀錄要進發，阿仙奴勢必搏盡。

阿仙奴兵源夠充足

施捷斯尼、哥斯尼同埋阿歷士張伯倫會因傷缺陣，後者仲會做手術，不過兵工廠目前嘅兵源尚算充足，故此影響唔大，足智彩開讓球盤，主場嘅般尼難阻阿仙奴開出半球、一球上盤。